Maak boelie-ouers boelies groot?

Daar is ‘n nuwe advertensie waarin die suggestie geskep word dat kinders wat deur hulle pa’s geboelie is, self boelies word as hulle grootmense is.

Ek dink almal weet dat ek ‘n kleintjie dood het aan boelies. Ek is self in graad 8 (standerd 6 toe) deur ‘n baie groot meisie geboelie. Ek was die kleinste in die standerd, dus baie klein as mens in ag neem dat ons so 250 leerders per standerd was.

En sy was een van die grootstes, en baie rondborstig. So groot dat die kinders haar Dairy gedoop het. Sy het besluit ek moet geboelie word.

Dus het sy elke dag voor die Engelse klaskamer, wat ook my registerklas was, vir my gewag. Ek kon maar vinnig maak of draai soos ek wil, sy was voor my by die deur. En dan het sy gespot omdat ek so klein is, gevra of my ma weet waar ek is en so aangehou om my verbaal te boelie.

My pa se raad was dat ek haar tromp op loop en vir haar sê dat ek nie vir haar bang is nie. Sy is groter as ek en gaan harder as ek val. Die klas se stoep was effens gelig, mens kon nie net afstap nie. En sy het altyd daar gestaan.

Ek het doodbenoud die raad gevolg en haar aangepraat. Anders as wat ek verwag het, het sy my nooit weer geboelie nie, maar, ek kon ook nie met haar vriende word nie. Al het sy hard probeer. Sy probeer selfs nou nog as ons mekaar by reünies raakloop, maar gits nee, ek kan haar nie as vriendin beskou nie. Ek bly lugtig vir haar.

Iedergeval, so gebeur dit dat ek Vrydagaand na kleinkind kyk terwyl ons by die klubhuis eet. En daar boelie ‘n seuntjie die ander wat in die speelplek vol balle sit.

Hy spring in om raak te spring, en dit kan hulle ernstig beseer.

Veral omdat kleinseun daarvan hou om homself onsigbaar onder die balle te maak terwyl hy onder die gekleurde balle lê.

Ek het twee keer gepraat en toe hy nie ophou nie het ek vir hom gesê hy moenie boelie nie.

Toe ek weer sien, kom hy met ‘n jong vrou aan die hand daar aan. Wys na my en sê ek is die lady.

Nou moet ek byvertel dat ek terwyl ek skool gehou het ‘n renons in ouers ontwikkel het wat die kind se part vat sonder om te vra wat gebeur het.

Dus loop ek na haar toe, wys na hom (hy hou mos van point) en sê dat hy nie saamspeel nie, hy boelie die seuntjies en dogtertjies.

Haar verweer?

Hy is net opgewonde omdat sy nefies daar is.

Ek het haar aangekyk met daardie waarom eht ek probeer kyke en gesê as die ander nie lag nie, is dit nie speel nie.

‘n Rukkie later het ‘n laventelhaan aangestap gekom, seuntjie (seker 3) se ewebeeld. Anders as die seuntjie het hy nie vir my kans gesien nie en in sy spore omgedraai.

Nog later speel kleinseun op so ‘n uitgesnyde halfmaan en maak twee groter seuns hom gevaarlik, dat hy op sy kop kan val.

Een het vir hom gesê dit is sy beurt, maar kleinseun het bly lê en geantwoord:

“My turn!”

Toe dit nie werk nie, probeer hulle hom omtiep.

Ek het hom gaan afhaal en gesê ons moet iewers anders gaan speel, hierdie seuntjies weet nie hoe om te speel nie.

Net om te hoor hoe ‘n 7- of 8-jarige klein snuiter vir die ander een sê dat die “auntie anxious” is.

O my jitte, seker by boelie-pappa gehoor? Dit is nou die een wat nie sy seun se geveg vir hom wou kom klaarmaak nie.

En nou wil ek weet: Is dit vir die pa en ma reg as die kind boelie? As hy ander kinders seermaak? Verstaan hulle nie wat aanvaarbare sosiale gedrag is en wat nie?

En ja, voor jy vra, ek is gereed om kleinseun se gevegte namens hom te veg as hy geboelie word. Hy hoef nie terug te veg om dan as die skuldenaar uit die stryd te tree nie.