Hy is toe al die tyd ‘n ongure karakter …

Het jy iemand al soveel vertrou dat jy hom met jou persoonlike lewe ook vertrou het, net om later agter te kom dat hy (of sy) ‘n skurk is? Wel, ek het. En ek moet seker nie verbaas wees nie, want ek is geneig om mense die voordeel van die twyfel te gee …

Dit lyk egter vir my of ek meer moet twyfel, want dit lyk asof dit die normaal is onder die eienaars van tegnologie-reuse soos Facebook, WhatsApp, Microsoft en McAfee. Hulle word magsdronk – dink later nie meer logies nie. As hulle die gebruikers nie dreig nie (Facebook met WhatsApp), hoor jy dat hulle nie betroubare gesinsmense is nie. (Microsoft).

Daarom behoort ek seker nie geskok te gewees het toe ek in die Huisgenoot lees dat John McAfee – die ontwikkelaar van McAfee anti-virus sagteware in die tronk is nie. Ja, ek beskou Huisgenoot wel as ‘n tydskrif wat nie op my rak hoort nie omdat sy wins uit ander se hartseer gemaak word. Soms trek die voorbladstorie my egter om oop te maak en te lees, maar ek neem die berig met ‘n groot knippie sout.

Ek weet nie hoeveel jy van virus sagteware weet nie, maar ek dink tog McAfee is aan baie mense bekend.

Ek het dit op my rekenaar gelaai op ‘n stadium toe Norton Antivirus net heeltemal buitensporig duur geraak het. En ek was regtig baie tevrede daarmee.

Daarom was ek verras toe ek lees dat John McAfee – die ontwikkelaar van die sagteware – allesbehalwe ‘n goeie karakter was. Dit is – as mens ‘n juffrou was – sleg om te weet dat iemand met sulke breinkrag – wat hom van die eerstes gemaak het om sagteware te ontwikkel om virtuele skurke en virtuele diefstal hok te slaan – die pad byster geraak het.

Hy het MacAfee reeds in 2010 aan Intel verkoop en skatryk weggestap. Tog ken ek sy produk juis van die begin jare af, in daardie tyd toe hy die baas van die plaas was, want hy het my en miljoene ander mense oor die aardbol heen gehelp om ons rekenaars teen skelms te beskerm.

Hoe kan hy dan self ‘n skurk wees?

Hy het onlangs op die ouderdom van 75 – terwyl hy in ‘n Spaanse tronk aangehou is – gehoor dat hy weens belastingontduiking aan Amerika uitgelewer gaan word. Daar is ander stories ook, maar ek wil nie die baba met die badwater uitgooi nie. Hy het volgens gerugte daarna selfmoord in die Spaanse tronk gepleeg, maar daar gaan waarskynlik ondersoek ingestel word omdat hy tweets uitgestuur het dat hy op so ‘n manier vermoor gaan word dat dit soos selfmoord lyk.

Ek wonder wat in sy lewe gebeur het dat hy so sleg uitgedraai het. Hy het twee keer vir die Amerikaanse presidentskap gestaan, blykbaar in 2016 en weer in 2020. Hy het die aarde aan sy voete gehad, in die wolke gewerk om kuberskelms se truuks uit te ruik en stelsels in plek gestel om kubermisdaad te voorkom.

En nou is hy dood, sal mens nooit weet waarom iemand wat eintlik bekend moet wees, berug gesterf het nie. Dit is een woord wat ek altyd aan my skoolkinders moes verduidelik – as iemand bekend is omdat hy slegte goed doen, is hy nie ‘n bekende nie, hy is berug,

Dit laat mens die waarheid in sommige stellings besef:

Geld is nie alles nie, dit maak die lewe wel makliker. Hy kon sy geluk nie koop nie. En dit is so hartseer. Dit laat my aan ‘n “grappie” dink wat ek onlangs gelees het:

Hy is so arm, hy net net geld.

Dit is so jammer dat dit as ‘n “grappie” beskou word. Dit is hartseer, want stinkryk mense het altyd ‘n skare om hulle, soos wat mens ook van sy foto’s op die internet kan aflei.

Daarom hoop ek dat hy vriende ook gehad het, mense wat nou oor sy dood rou. Self wens ek hom voorspoed toe waar hy homself ookal tans bevind. Sy McAfee het my rekenaars beskerm terwyl ek my meestersgraad verhandeling en doktorale proefskrif geskryf het. Twee lywige boeke. Ek het McAfee as doeltreffend beleef.

Dus skryf ek vandag:

Ek ken jou nie as ‘n skurk nie, maar as iemand wat skurke gekeer het om hulle vingers in my rekenaar en my internet netwerk in te slaan. Jy het my gehelp om my studies sonder probleme te voltooi, maar ook om my rekenaar teen invallers te beskerm. En daarvoor sal ek jou altyd dankbaar wees:

Rus in vrede, John McAfee!

(Hooffoto krediet – https://upload.wikimedia.org/wikipedia/commons/thumb/a/af/Villainc.svg/1200px-Villainc.svg.png.