Die Goue Vroue het weerens ‘n bloguitdaging gestel: Deel jou kalenderfoto vir jou verjaarsdagmaand en ‘n resep vir die kookkunsklasse wat ons op Rebusfontein moes aanbied.
Nou kyk, ek is nie een vir foto’s van myselwers nie en koskook is ook nie hoog op my agenda nie. Dit is, as my kinders kom kuier. Maar om vir manlief kos te maak is ‘n vervelige saak. Rys, vleis en aartappels, groente kry ek met moeite in sy bord, verdoesel dit in die sous dat ek weet hy kry sy vitamines en minerale in. Dan natuurlik, is pap en braaivleis en hamburgers ook op sy spyskaart … Hoe hy in vorm bly, weet nugter. Seker maar my groentes wat in die souse versteek word.
My foto vir Augustusmaand is dus nie van my nie, maar eerder van my yurt wat op Rebusfontein staan gemaak is. ‘n Ronde huisie, van tent gemaak. Geen plek vir spinnekoppe om weg te kruip nie en vlermuise kan ook nie hangplek kry nie.
Voor die foto vir Augustusmaand staan die produk van my resep wat ek hier gaan deel.
GEURIGE ROOIBOSTEE – ‘N SUID-AFRIKAANSE VARIASIE OP KERSFEES KAZAKHTEE
Almal wat my van die begin af volg, weet dat ek moes ophou koffie drink, en dat ek juis in Kazakhstan geleer het om tee te drink. Ek het al heelwat oor Kazahtee geskryf, maar nog nie ‘n resep gedeel nie.
Ek mis die vrye gevoel van Kazakhstan, die gegeurde tees, die effektiwiteit van voorsiening van krag en water en internet. Tog is my hart in Suid-Afrika, wil ek nie teruggaan nie, eerder ‘n stukkie Kazakhstan hierheen bring, maar verSuid-Afrikaans.
My resep is dus nie vir kos nie, maar eerder vir ‘n variasie op die Kazakhs se kersfeestee. Ons gaan juis nou in die winter in, en met die pandemie wat opgeboude weerstand vereis, kan elkeen gerus vir haarself elke dag so ‘n pot ee maak.
Dit is my eie resep, gebasseer op teemaak in Kazakhstan, maar met eg Suid-Afrikaanse bestanddele.
Dit was noodsaaklik om ‘n Suid-Afrikaanse variasie te skep omdat ek nie weer daar sal uitkom nie. En nou verkies ek dit bo my sakkies met Kazakhstantee, wat ek saamgebring het en baia, baie spaarsamig gebruik.
Resep
Bestanddele:
- 1 sny van ‘n pomelo, die vlees moet mooi ryp wees
- 2 sakkie Rooibos tee, kan ongegeur of gegeurd wees. Beide is heerlik
- 2 steranyse – sien foto.
- knippie kaneel
- snytjie vars gemmer, fyner gesny om geur te laat ontsnap
- 2 teelepels heuning indien jy soeter tee verkies.
Metode
- Laat die ketel met genoeg water kook
- Gebruik ‘n teepot wat ten minste drie koppies tee sal maak, ek gebruik ‘n “plunger”
- Voeg die pomeloskyfie, steranys, kaneel en gemmer in die pot
- Voeg heuning by, maar probeer gerus eers sonder soetigheid
- Voeg die twee sakkies rooibostee by – ek het Carmien hier in Kuruman ontdek
- Voeg die kookwater by nadat dit nie meer borrels maak nie
- Laat staan vir 5 minute
Skink en geniet die geurige smaak van ‘n koppie Kazakhstan kersfeestee – met ‘n Suid-Afrikaanse kinkel – en so gesond as wat kan kom.
Ek het Carmien se Orange Camomile groen rooibostee gebruik. Dir by die pienk padstal in Kakamas gekoop. Die kleur is heelwat rooier met ander variasies van rooibostee.
Toets asseblief en laat weet hoe dit proe. Ek is gek oor die smaak, die volrondheid van die tee, die kleur, die geurige aroma wat uit dit stoom as ek dit drink.
Die res van die stories kan hier gelees word …. https://fresh.inlinkz.com/party/e510564f63d7492b9d9a4654518443af
Dr. Christa van Staden 
Geurig!
LikeLiked by 1 person
Baie, baie lekker.
LikeLike
Ek is ‘n GROOT koffiedrinker. Maar hierde tee gaan ek probeer vir daardie winterdae as my hart oor die rante stap en my mond droog word van verlang na Nanibië.
LikeLiked by 1 person
Hi Bitterbessie, dit is baie lekker en die pomelo word al hoe streker hoe langer dit in die pot is. Ek was ‘n groot koffiedrinker. Agte en meer koppies koffie per dag, met baie melk. Toe word ek laktose weerstandig en moes ek melk los. Koffie sonder melk is sleg. Swart tee is bitter, amper so bitter soos koffie. Ons het toe in Kazakhstan gebly, öskemen in die noorde, waar mens nie koffie in restaurante kon bestel nie. En toe ontdek hulle tee. In restaurante is dit nie sakkies met tee nie, maar vrugte en goed wat in die warm water week en die heerlikste tee maak, met heuning as mens sou wou. En die soorte tee kry mens dan ook in sakkies te koop, met allerhande geure. So anders as Suid-Afrika. Waar jy swart en groen tee kan koop. Intussen het Suid-Afrika se rooibosbedryf bygekom, ek ontdek die lieflikste tee hier. En rooibos is gesonder as ander tee, dus kan ek heeldag tee drink, soos toe ek koffie gedrink het.
LikeLike
Wat ń pragtige prentjie van jou ronde huis, Christa. Alhoewel ek nie rooibostee drink nie, lyk jou resep regtig inspirerend lekker!
LikeLiked by 1 person
Una, ek kon rooibos nie verdra nie, maar as jy eers gewoond raak aan rooibos met vrugte geure, gaan jy nie sommer weer gewone tee drink nie. Dit is baie lekker, het nie daardie kenmerkende reuk nie, die ander geure neem oor. Maar ek vermoed dit is ‘n baie gesonde drankie – warm of kou.
LikeLike
Wonderlik dat jy ‘n teeresep deel. Ek het dit dadelik afgeneem. Mens word maar lekker moeg vir die gewone tee. Nou gaan ek afwisseling hê. Moet net die bestanddele gaan kry. Baie dankie liewe vriendin!
LikeLiked by 1 person
Jy kan enige teesakkie gebruik – hulle gebruik gewone swart tee. Die rooibosweergawe is uitgedink om dit SA geur te gee. En baie, baie lekker.
LikeLike
Die tee sal ek probeer, maar sal heuningbos tee gebruik, rooibostee, nee dankie. Die reuk!!!!! Dis ń storie van assosiasie.
LikeLiked by 1 person
Haai Trommeltjie, die pomelo vat die rooibos se reuk heeltemal oor, maar ja, heuningbos is Suid-Afrikaans en baie goed. Kan die pomelo ook met lemoen vervang
LikeLike
Klink al hoe beter. Ek is lief om gemmer, suurlemoen en heuning in die winter te fdrink, soms met bietjie kaneel by.
LikeLiked by 1 person
Dit gaan awesome wees met dien rooibostee.
LikeLike