Foonsnolle pla – behalwe as dit Steve is

Sjoe, ek moet ophou vertel wat my irriteer. Maar ek gaan vandag moet vertel.

Ek het ‘n fluitjie by my lessenaar, vir foonsnolle. Dit is nou daardie mense wat my bel om lenings en wat ookal aan my te probeer afsmeer. Die wat my die kwaadste maak, is die wat ‘n masjien stem gebruik om goed aan my te wil verkwansel. Want die fluitjie werk dan nie …

Dan sit ek neer, baie ontevrede met die mense. En blok die nommer om nie weer so gevang te word nie. Dit help egter nie, ek word net van ander nommers gebel.

Vanoggend was egter anders.

Foon lui en ek sien dit is 010 nommer. Wil nie antwoord nie, maar antwoord toe tog maar want ek wag vir ‘n pakkie. En so kry ek die lekkerste verrassing.

Steve Hofmeyr se stem in my oor.

Toe ek die rasperstem hoor, was ek skoon verward. Stomgeslaan, en probeer gelukkig nie terug hallo sê nie. Hy vertel van sy Steve doen Steve show, wat by die monument gaan wees. Ek is nie lus vir sulke groot shows nie, maar sjoe, hierdie advertensie sal my nogal oortuig om wel te gaan.

Ek het nie neergesit nie, ingedagte na sy stem bly luister. Moes nou gaan Google om die details van die vertoning te kry …

Ek sien hom elke jaar in Stilbaai, en dit is absoluut lekker om die kaartjies vir my en manlief te koop.

Dalkies veroorsaak hierdie mooi opgeneemde foonboodskap dat ek Steve se vertoning by die Voortrekker monument gaan kyk. Al is dit net omdat ek “persoonlik” genooi is.

So terloops, geen ander sanger of sangeres gaan dit regkry dat ek nie vies is vir die opgeneemde boodskap nie. Dan na-aap hulle mos vir Steve. Miskien Bobby? Die man se skewe skaam glimlag en spiere wat so vertoon word op sy advertensies sal my ook dalk heel droomverlore laat luister tot die oproep afgesluit word …