Tuisgemaakte appelkooskonfyt in Qazaqstan – Thermomix

Gister het ek vertel van sago-poeding en dit het my teruggevat na my kinderjare. My ma het ons s’n met applekooskonfyt gemaak. Ek kan nou nie presies onthou hoe die resep gewerk het nie, maar ek het skielik lus gekry om appelkooskonfyt te maak.

En ek weet, mense wat my ken sal dalk giggel, want dit is April, die sneeu het na bykans vyf wit maande gesmelt, maar dit is sommige dae nog koud genoeg dat dit weer sneeu. Hierdie tyd van die jaar is appels te koop, lemoene en as mens gelukkig is, kan jy ;n pynappel ook te koop kry. Maar nie appelkose nie.

Dit, is egter geen probleem as jy in Qazaqstan bly nie, want baie van die vrugtes is in bevrore formaat te koop. Soos appelkose. Agterop die pak staan dat mens soveel moet uithaal as wat jy kan eet, in ‘n toe bak moet laat om te ontvries en dan binne 24 moet eet. Dit het ek gedoen en ek en manlief was nie te gelukkig met die resulate nie. Dit was effens verkrimpeld, wat die gedagte aan ou vrugte gee en dit was effens te suur.

Maar, die skilletjie was op en dit het my aan my kinderdae herinner toe ons vir ma die appelkose moes halveer, pitte uithaal en skoon was. Want sy het dit ingelê of in konfyt verander vir die maande wat daar geen appelkose te koop id nie. Ook nie in ons boord nie, daar het ‘n paar soorte vrugtebome gestaan.

Vir konfytmaak was ek egter nie regtig lus nie. Ek onthou dit as ‘n lang, taai proses. Groot potte wat op die AGA staan en prut, taai sous wat mors as mens gou proe wanneer ma nie kyk. warm stoof wat vingers kan brand as jy nie kyk wat jy doen nie. Seer maag as jy te veel van die warm konfyt geproe het.

Hemelse konfyt met die velletjie wat stuk-stuk geproe kan word. Soveel anders as gekoopte konfyt. Soveel lekkerder dat ek gereeld met gekoopte konfyt teleurgesteld is as dit by plaasstalletjies gekoop is. Soveel lekkerder dat ek nie konfyt koop nie. Maar, manlief het ‘n soettand wat van konfyt op sy roosterbroodjie hou.

So speel ek vandag met die gedagte om die bevrore appelkose te ontvries en in konfyt te verander.

Ons kry sowaar hier en daar iets in Engels op die rakke die afgelope ruk.

Gedagtes wat dan mos nie weer wil laat gaan nie, dit broei dan juis van gister af in my onderbewuste. Ek is nos nog lus vir sago-poeding ook!

Dit was ook nie te moeilik om ‘n Thermomix resep op te spoor nie. Een vinnige soektog en ek het drie gehad om van te kies. Dus het ek ‘n resep, ek weet hoe die konfyt moet lyk as dit gaar is, kan onthou dat my arms as kind lam geraak het van met die houtlepel roer en roer en roer dat dit nie vasbrand nie. Ek was gereed vir die avontuur. Hier is die resep wat ek aangepas het om by ons smaak te pas.

Bestanddele

• 1000 g gehalveerde, ontpitte appelkose (bevrore by Metro, 1 kg)
• 200 g suiker (kan meer gebruik vir soeter konfyt)
• sap van twee kleinerige suurlemoene

Metode

• Meet die appelkose in die maatbeker in
• Meet die suiker in die maatbeker in
• Meng vir 10 sekondes vinnig op nommer 9
• Stel die masjien as volg op: Tyd = 60 min, hitte = Veroma; spoed = 2; omgekeerde lemme

Ek het gevind dat die konfyt na 40 minute gaargekook en gereed was, dus het ek afgehaal. Ek het bevrore appelkose gebruik. Dit is moontlik dat vars appelkose langer gekook moet word.

En so lyk die konfyt as dit mooi gekook het.

Die kleur is mooi en die skilletjies het daardie suurderige, growwerige tekstuur aan die konfyt gegee.

Wat ek dan more moet doen, is om ‘n vars brood vir die konfyt te bak … Sago kon ek nog nie kry nie …