Ek het die sjokoladekoekresep in die Thermomix Basic Cookbook aangepas en dit is heerlik. Supersag, smelt in die mond koek met ‘n boonste lagie wat effens krakerig is en in mens se mond smelt!
Die koek het geen versiering nodig nie, dit gee eerder die idee van brownies, my seun se gunsteling gebak.
Bestanddele
- 140 gram ongesoute botter, in stukkies gesny
- knippie sout
- 170 gram suiker
- 6 eiers, geskei
- 260 gram donker sjokolade skyfies (die fyn soort vir bakdoeleindes)
- 55 gram koekmeel
Metode
- Spuit ‘n vierkantige koekbak met Spray-and-Cook
- Voorverhit oond tot 200°C
- Sit die skoenlapperklitser op sy plek in die TM-houer
- Voeg die eierwitte by
- Klits vir 6 minute teen 3.5 spoed (of tot die eiers styfgeklits is)
- Voeg 20 gram suiker by en klits 20 sekondes teen 2.5 spoed
- Verwyder die skoenlapperklitser
- Gooi die mengsel in ‘n ander maatbeker oor
- Sit die res van die suiker, eiergele en botter by
- Meng vir 6 minute teen 70°C en 4-spoed
- Voeg sjokoladeskyfies by en wag ‘n oomblik dat dit smelt
- Meng vir 20 sekondes teen 5-spoed
- Voeg koekmeel by
- Meng vir 10 sekondes teen 5-spoed
- Sit weer die skoenlapperklitser op sy plek in die TM-houer
- Voeg die eierwitmengsel by
- Meng vir 15 sekondes teen 2.5 spoed
- Gooi di mengsel in die bakpan oor
- Bak vir 20-25 minute
- Laat eers in die pan afkoel voordat dit op ‘n afkoelrak omgekeer word
- Bedien warm of koud.
Wenke
- Die mengmetode en die baktyd veroorsaak ‘n sagte binnekant. Die baktyd in die basiese resep is 10-15 minute om ‘n roomagtige binnekant te skep. Ek verkies die langer baktyd, wat ‘n brownie-agtige binnekant veroorsaak. Speel dus met die baktyd om die tekstuur van die binnekant na jou smaak te verander.
- Dit is onnodig om hierdie koek te versier, die tekstuur van die boonste lagie, wat neig om te skilfer, is hemels.
Dr. Christa van Staden 