Shilo is ernstig beseer, en ek weet nie hoe nie

Ek is kwaad, hartseer, alles in een. My jongste Miniatuur Schnauzer is ernstig beseer en ek weer nie hoe of wanneer nie. Laat ek dan probeer om dit uit te klaar.

Ek en manlief was die laaste deel van die vakansie meer uit die huis as binne. En in die week is Shilo ernstig beseer.

Hoe kom ek by daardie slotsom uit?

Ek het die een middag by die huis gekom en hulle geroep om op die stoep te eet. Want al die woewe moes buite slaap omdat mense by my kom bly het met groot skaaphonde. Daar was altesaam 8 honde in die erf – vier Miniatuur Schnauzers en vier skaaphonde. My drie Schnauzers, seun se een wat VV se kind is, seun se skaaphond, sy skoonsuster se twee rescue skaaphonde en sy skoonma se een rescue skaaphond.

Dus – ses grootmense, een kleinkind en agt honde in die erf. Meer honde as mense. Manlief het voet neergesit – al die honde slaap buite. Is heel dag buite. Myne ook.

Ek het ingestem dat die honde buite moes slaap, dus moes my kinders ook buite slaap.

Ek weet! Dit is my huis en my honde. Hulle mag dan mos in my huis wees en die ander buite?

Wel, dit is nie so eenvoudig nie.

Twee van die honde is seun s’n. Dus wou ek nie drama veroorsaak as myne mag in wees nie.

Wens ek het die drama by die horings gepak.

Want dan het ek presies geweet wanneer my kind so seer gekry het.

Ek neem aan dit was tussen die 1ste en die 3de Januarie, maar my geheue laat my in die steek omdat ek net nie kan onthou watter dag wat gebeur het nie.

Shilo wou skielik nie meer die trappe uitklim nie, hy het gekerm dat ek moet help. Waarom het ek nie bekommerd geraak nie? Hy was dan al baie saam met ons by die see en hy het die trappe maklik op en af geklim.

Ek het gelag, hom gaan optel en op gedra, al is hy swaar. Neergesit en toe weier hy om in die huis in te stap. Hy het gebewe soos ‘n riet, en ek het aangeneem dat iets moes gebeur het dat hy nie in die huis wil inkom nie. Maar ek het getroos en gepaai en hy is uiteindelik bewend agter my aan. Die huis in om kossies te gee.

In hierdie tyd het hy elke dag vreeslik gebewe, so erg dat ek gedink het dat hy koud kry en vir hom – en sommer die ander Schnauzers ook – hulle jassies aangetrek het. Hoe moes ek weet dat hy van pyn bewe?

Ek kan nie onthou dat hy moeilik geloop het nie!

Ons was die 4de tot die 7de alleen by die see. En hulle was die hele tyd by my in die huis. Tog het ek niks vreemd gesien nie, behalwe dat Shilo nie die trappies op of af wou klim nie.

Terug by die huis het ek ‘n vrot yskas gekry en al my aandag was by die skoonmaak van die gemors. Ek was siek van sinus en hooikoors en het nie gesien dat Shilo moeilik loop nie.

Teen die Vrydag het hy so moeilik geloop dat ek met hom na Highveld Dierekliniek toe is, ek dink sy been is beseer, hy weier om daarop te trap.

Die jong veearts het niks op die x-strale gesien nie en my met pynmedikasie huis toe gestuur. As hy teen Maandag steeds moeilik loop, moet ek teruggaan vir x-strale onder narkose.

Sondag besluit ek om hom na Family Vet dierekliniek toe te vat. Die veerarts aan diens kry ook geen fout op die x-strale nie, maar die heup en die knie lyk so effens uit hulle potjies. As hy na ‘n week steeds moeilik loop, moet ek vir opvolg x-strale teruggaan. Maandag bel sy om te hoor hoe dit gaan en herinner my daaraan dat ek na ‘n week moet teruggaan vir x-strale.

Saterdag is ek weer na Family vet toe, maar ‘n ander veerarts is aan diens. Sy praat ‘n interessante Hollands.

Shilo se beskermengel!

Sy bly baie lank weg en ek is naderhand siek van bekommernis. BB en Bekka is by my, want hulle moet geïmmuniseer word. Shilo is by Highveld geïmmuniseer, hulle sou ook soontoe gaan. Maar toe vertrou ek hulle nie meer nie.

Toe sy terugkom, sê sy dat Shilo se pelvis gebreek is. Dat hy waarskynlik geskop is.

Nou vra ek jou: Wie kon my hond geskop het? Het iemand in die erf ingekom toe ons nie daar was nie? As iemand het, sou Shilo gestorm het.

Ons het kameras op, maar daar was mos gereeld beurtkrag, vir ure lank.

Het hy op ander manier seergekry?

Wat het gebeur?

Hoekom het niemand gehoor toe hy beseer is nie?

Ons moes dus almal uit gewees het. Wanneer was daar niemand by die huis nie? Die 2de was almal in Mosselbaai. Was iemand toe in ons erf?

Dit moes verskriklik seer gewees het – hy moes gekerm het. Daarom sou ek en almal wat daar gebly het geweet het toe hy beseer is.

Ek troos my daaraan dat ek nou weet wat fout is, en dat die pelvisbeen sal genees. Gaan agt weke vat, agt weke waarin hy baie stil gehou moet wees.

Hy moes van dag een af stil gehou gewees het.

Basies in ‘n hok gesit het vir die eerste week.

Maar, ek het nie geweet dat my hond geskop is nie.

Nie geweet dat hy beseer is nie.

Nie geweet wat ek moet doen om die herstelproses te bevorder nie.

En hy wil loop, wil oral wees waar ek is, sukkel agter my aan.

Nou het ek vir hom ‘n baba hok gekoop waarin babas gesit word om nie oral heen te kruip nie.

Van môre af is hy op hok-arres. Ekke ook, sal die hok sit waar ek tik op my rekenaar. Dat ons twee mekaar geselskap hou. Want, manlief is vanoggend weer vir die week weg vir werk.

My hart is stukkend, ek voel soos ‘n baie slegte mamma. Het selfs gelag toe ek hom die trappe opdra. Waar de ongeluk was my verstand heen?

Die veearts is nie baie bekommerd nie, dit gaan herstel. Agt weke om te herstel.

My arme woefkind.

En ek wonder: Waarom het ek my eie woewe laat buite slaap en nie bedags in die huis gehou nie?

Ek is egter net so dankbaar dat die fout opgespoor is.

Ek kan Family Vet Dierekliniek aanbeveel.